“أيوا أعرف .. من زمان ما كتبت..أمشوا نسولف!”

على مكتبي كان فيه دفتر قديم .. أخذته للشغل وأنا طالعه بالغلط ،
فتحته بالسياره أكتب .. ما فيه ولا صفحه فاضيه ..
هذا الدفتره يمثل سنتين من حياتي .. سنة ما بعد الثانوي ، وسنه أولى جامعه ..
أول صفحه كان مكتوب عليها “أصول الفقه لابن عثييمين-الشريط الأول” فالزمن الغابر انغصبت أسوي أشياء كثيره بس أكيد ان هالشي كنت مسويته من حب ..
كان واضح اني أتعذب .. لأني أعرف عن نفسي ان سماع الأشرطه يتعب مخي .. ولازم أعيد كل 15 دقيقه عشان مخي يتنح ..
وغير كذا .. كنت ألخّص .. وألخّص باخلاص ..
وأشرح تلخيصي .. وأنا شخص .. لا يلخّص وولا يحب التلاخيص ..
قرأت كلامي .. يا الله ، ايش اللي حفزني أدرس أصول الفقه؟
اش اللي خلاني أقرر قرار زي كذا مع اني كنت أفهم نفسي كفايه اني أعرف ان عقلي لا يمكن أن يستوعب هالأمور استيعاب تام..
صدقا صدقا ما أتذكر شي من اللي كنت كاتبته ..
فتحت الصفحات ، كنت أكتب كم دقيقه من شرح بن عثيمين صار مو مسموع ..وبالرصاص أحط شرح .. وبالتركواز أكتب أسئلتي داخل دوائر كبيره مكتوب داخلها “سؤال”.. ودي أعرف ايش الحافز؟ ..
بعد الأشرطه تلاخيص ثانيه .. بعدين فجأه كذا .. شرح الكالكلس .. قعدت أضحك .. هذي الماده أخذتها بالصيف، وكنت مصره آخذ فيها درجه كويسه ..
وكنت مره مخلصه بالتلاخيص والشرح وكنت مخلصه بالدراسه والتمارين  ..
بعدها بشوي لقيت جدول أعمالي اليوميه بالعطله ، أنا متأكده ان هالعطله اللي كتبت فيها جدول أعمالي كان بعد الصيفي ..
يعني كان قدامي ثلاث أسابيع تقريبا مو أكثر ..
كانت مرتبه انو أتعلم شغله معينه بالفوتو شوب .. وزي العاده .. زحمت نفسي بمليون شغله فكل يوم . .
وأكيد بدون ما أبحث عن دلائل .. أكيد اني ما طبقت الا 20% منها .. ويمكن أقل..
طبعا في داخل الدفتر أفكاري واقتراحاتي لنفسي .. تويتري الخاص تقدرون تقولون .. ونفذت من الاقتراحات اللي قريتها .. يمكن ثلاثه بس ..
عشان أقول لكم النتيجه اللي وصلت لها من هذا الدفتر المليان بالانجازات الشكليه ..
تلاخيص الأشرطه وبعض الكتب كان فيها أسئله حمقاء جدا ، وللحين ما أعرف ايش جوابها .. يعني أنا ما سألت زي ما كنت أبي .. وبصراحه شديده .. ما أذكر شي منها الا يمكن 1%..
الماده أخذت فيها درجه عاديه .. يمكن B+  أو A  يعني مو A+ حتى بس أذكر كنت فرحانه فيها لأني فاشله بالرياضيات ..
وزي ما قلت .. الجدول الفنان الجميل .. طبّقت منه 20% بس .. الشي الوحيد اللي أتذكر اني وصلت له اني رسمت رسمات جديده بس التقنيات الجديده اللي أبي أتعلمها ما تعلمتها ..

دايما كنت أعذّب نفسي بموضوع الأهداف واني ما أوصل للي أبيه ، واني المره الجايه بلقى حل أحسن وخطه أفضل وأركز على بعض الأمور ..
من هالدفتر .. أدركت اني زي ما أنا مره كويس اللي أسويه ، يعني اللي سويته وصّلني لأشياء كويسه .. تعلمت شوي وأخذت درجه مو واطيه .. ورسمت أكثر .. يعني مو اني طلعت بلاش بالعكس .. أشكر ريم القديمه على هذي الفتره ،
أحيانا أخطاء التخطيط ماهي أخطاء فعلا .. يمكن ان الكميات الهائله اللي حطيتها لنفسي وما نفذتها مستحيل انجازها .. بس على الأقل أنجزت منها 10% .. وهالـ10% بقت معاي .. وأنا شخص كان يحاول .. ومحاولتي فعلا مو فشل .. والأشياء الغبيه الصغيره اللي سويتها ..
تعتبر انجاز ..

من هذا الدفتره أدركت .. ان قصص الناجحين المخططين والمنجزين والكويسين جدا .. “خراط” ..
لأن يعني معليش  .. هم مثلا يجون يجيبون قصة آينشتاين اللي كان يجلس في مكتبه ومدري وشو انطرد من المدرسه مدري ايش
طيب واحد انطرد من المدرسه وصار مشهور وعالم .. لأنه .. عبقري “بكل بساطه”.. وعشره انطردوا وصاروا حراميه
بس أنا .. وانت يمكن .. احنا ألحين ناس عاديه ، ليه أقرر اني شخص مميز وقوي وبطل .. وأرفع راية الحرب على الحياه وأقرر اني أكون أفضل شخص وعبقري وشي مهول ..
وأنا لسا زي ما أنا .. ما كسبت مهارات التميز والقوه والبطوله ..

يعني نرجع لقصة آينشتاين مدري أديسون لما انطرد من المدرسه . . لو أنا مو أديسون وانطردت من المدرسه لأن الأستاذ يقول اني غبي .. بروح أتعلم وأحاول وأعوّض نقصي .. يمكن اني عبقريه بنسبة “2.2%” .. ويمكن لأ . . بكل بساطه ممكن أكون شخص عادي يحتاج يبذل مجهوده ..

لما أرفع الرايه وأقرر اني مميز .. لابد أن أكسب ما يؤهلني اني أكون مميز ..
مو بانجاز ، لأ .. مهارات .. محاولات .. جهد .. عرق جبين .. ضغط على نفسي .. صدق مع الذات ..
ومو لازم أخترع الكهربا ، بس ممكن أصير انسان أفضل شوي ، أحسن شوي .. نسخه معدّله ..
على الأقل .. على الأقل ما أظل عايش مع نفس الانسان طول العمر .. أغيّر فيه حبه .. حبتين ..

تذكرون مقولة طارق السويدان “يعيش عادي ويموت عادي”
العادي مو هو الانسان اللي ما عنده جينات العبقريه أو الذكاء الخارق اللي عند طارق السويدان ، العادي فنظري هو الكسول ..
اللي يحاول بصدق ويبذل بصدق .. حتى لو ما وصل .. بيموت وهو يحاول .. والمحاوله جميله وتعطيك شعور مب عادي ..
وتحس انك مو عادي .. وانت بتكون مو عادي ..
والمية لون اللي استخدمتها بالتلاخيص بالدفتر الأخضر دليل على احساسي المو عادي

تحسون انكم فهمتوا شي؟

الزبده ، أنا قررت انه لا عيب في اني لسا ما وصلت لما يؤهلني أكون آينشتاين والا عمر بن الخطاب والا طارق السويدان ..
قررت اني شخص يبي يكون سعيد .. وشخص عادي يحاول

يا رب اجعلنا نفهم وين الأولويات
الفيديو لحاله يتكلم !
جاني سؤال: أنا مسلم ليه؟

P.S
الرجل مسلم ! ويتكلم عن حالة المسلمين بدون تهجم عليه الله يعافيكم لأنه أي شتم أو سب ينحط تحت باب الغيبه ولذلك بحذف الرد شكرا

عندي حب غير عادي لهالبرنامج() أمنيتي أشتغل بشي في هالمجال الثري دي ،
اشتغلت عليه للحين سنه تقريبا .. ما اشتغلت كثير بس بديت أتعود عليه وصرت أقدر أعطي أو أعلم أحد في بعض الأشياء .. بالذات في المنتال راي ..
أفكر اني أسوي هنا توتوريال منتال راي ثري دي ماكس عربي على خفيف ، حل مشاكل أو أي شيء ذكي أتعلم عليه .. بس المشكله الدروس الانقليش كثيره وما أبي أكون يوسلس اذا كنتوا مهتمين بالبرنامج وحابين تلقون شي عربي أتمنى تقولون لي ..
يعني لو خمس أشخاص اجتمعوا وقالوا انهم مهتمين .. رح أحاول بقدر المستطاع أساعد بشي عربي ومواقع وفيديوهات ~

“ملاحطه فقط ، عندي خبره لكني ما وصلت لمرحلة البروفشنال ، بس حبيت أستغل الدروس اللي عندي + اللغه + الماده اللي آخذها هالسمستر في نفع أحد فقط لا غير”

للتصويت :

اضغط هنا ~

http://jackietakespictures.deviantart.com/art/Alyssa-reaching-114897469

الحياه كلها دوائر ،

الموضوع سهل ، المسأله كلها متى تبدأ وهل رح تنتهي؟
كل شي له بدايه ..
التدخين يبدأ بأول سيجاره ، الحوسه تبدأ بأول بلوزه تنرمى على السرير ، الطريق يبدأ بأول خطوه .. البدايات تكوينها سهل مهما كان صعب بالنسبه لمدى صعوبة النهايات أو استحالتها..
النهايات هي الشي المستحيل ، يعني مستحيل تنتهي من الحوسه دام انك عايش بالغرفه ، رح تظل الحوسه تبدأ وانت تنهيها ، والطريق ما له نهايه دامك تمشي فيه ..
الشي الوحيد اللي سهل انك ما تبدأ أصلا !
لا تبدأ بأي شي سلبي ، لا ترمي التي شيرت .. ولا تلقط لك سيجاره .. ولا تفتح باب مسكر .. وما راح تتعب بانك تلقى نهايه للشي اللي ما تتمنى انه يوقف ..
لا تسمع أول أغنيه ، ولا تطلع مع ناس مو كويسين أول طلعه ، لا تجرب وانت عارف انه غلط 100% وانك ما تبي ترجع لهالشي .. لا تعمل الدائره السلبيه عشان ما تتعب نفسك فكسرها .. لأنك رح تكون مشغول بتكوين دوائر ايجابيه ..
والشي المهم ، انك لما تبدأ دائره ايجابيه ما راح يكسرها الا دائره سلبيه.
الموضوع سهل صعب ، البدايات تكوينها سهل ودائم ، والنهايات بسرعه أثرها ينتهي .. وانت اللي معك القلم وانت اللي رح ترسم دوائر حياتك.
يللا ريم .. نرسم أول دوائرنا.

آخر مره دونت ، كان 10 ديسمبر ..
من هذاك الوقت للآن .. صارت أشياء كثيره صغيره  صرت 22 .. قربت من التخرج وصرت رسميا سينيور يير .. يعني فمثل هالوقت السنه الجايه بكون الخريجه ريم باذن الله تعالى ..
اشتقت لمدونتي .. اشتقت لتشوكليت والناس اللي لا زالت تقرأ لي

×

هناك فرق بين الذي “يعلّق على الكتاب ، وعلى الكتاب ذاته.”
×

حلمي ..
ان لما أحد يسوي سيرتش بالعربي يلقى معلومات
مشان هيك .. رح أكتب عن الأشياء الجديده اللي اهتميت فيها واستفدت منها ..
وأحيانا معلومات كويسه وبحوث أعجبتني .. خلونا نتبادل .. ونتعلم .. وما نضطر للوافي وغيره..

×

Chapter 8

الحقيقه ان هالتدوينه مو بس عن هالفصل من كتابي المفضل  ..هو مو أحلى تشابتر ولا أحسن واحد ولا أكثر شي أثّر علي .. لكنه .. اللي خلاني أفتح المدونه وأقرر أكتب لسبب ما ما أعرفه .

الكتاب : your erroneous zones

الكاتب :  Dr.Wayne W.Dyer

يتكلم الكتاب عن كل مواطن الضعف اللي فينا ، الاحساس بالذنب ، الغيره ، الخوف .. كل المشاعر والأفخاخ اللي نطيح فيها وما نقدر نطلع منها ، يتكلم عن خرافات الثقه بالنفس والحب والمعتقدات الغير واقعيه .. يتكلم عن الألم عن الحزن وعن كل شي احنا تبرمجنا نفهمه بطريقة ما وهو أصلا شي آخر أبسط وأسهل ..
في الفصل الثامن ، الفصل اللي رح أتكلم عنه اليوم ، يعنون وين داير الصفحه بـ The Justice Trap أو فخ العداله.

“If the world were so organized that everything had to be fair, no living creature could survive for a day. The birds would be forbidden to eat worms, and everyone’s self-interest would have to be served.”

الفصل قال لي ببساطه : الحياه مش عادله يا ريم !
مش لأن الله مو عادل ولا لأن الحياه صعبه ولا لأني ما أستاهل .. لأني أنا مو فاهمه ايش معنى العداله ..
قد مره عملت كل جهدك عشان تحصل على شي وأحد ثاني أخذ منك هالشي اللي تعبت حالك عشانه ؟ كم مره قلت لنفسك : مو عدل ! ايش هالحظ ؟

احنا بالذات تربينا على قصص الأطفال اللي تتكلم عن الحياه المثاليه اللي فيها الشخص الجيد الطيب يحصل على كل شي جيد وطيب، الولد الطيب اللي أمه طيبه وأبوي طيب وينظلم مره ويرجع له حقه بسرعه ، الولد الطيب اللي أمه طيبه وأبوه طيب وكل شي في الحياه كويس عنده ،المشكله اننا كلنا نحاول نكون هالولد .. بس الحياه ما تمشي زي القصه ، والكذاب مو دايم ياخذ جزاه ، والصادق مو دايم ينجو وكل الناس تحبه ..

دايما لما ما يحصل اللي نبيه ، نلوم أنفسنا .. أو الحياه .. ولما تكون الحياه ما تتعامل معنا بسياسة الـ  50|50 معنا .. نميل الى اننا نرفضها ، ونبدأ نسلك طريق التعاسه . وليت التعاسه هي النتيجه الوحيده ، كثير مننا يلوم الآخرين على فشله ، ويلوم العداله اللي تنقصنا في حياته الغير ناجحه ، حياته اللي ما صارت على الطريقه اللي هو يبيها .. وبالنهايه يستسلم لحياه أقل من اللي يبيها ، ويعيش فمراره.

خلونا نعد كم مره قلنا ان أحد ظلمنا ، واننا نتيجة لهالظلم نحس بالتعاسه ، تعالوا نعد كم مره قلنا ان الدنيا تاخذ مننا وما تعطي ، وكم مره خفنا اننا نعطي وما ناخذ ..
مفهوم العداله عندنا مضروب !!مفهوم العداله : خذ 1 وأعطيك 1 .. أنا طيب ، يجيني الطيب .. حتى لو ما قلناها بصوت عالي .. كل شي يحصل حولنا نربطه فينا ، فـ “ايش قد الحياه ما عدلت وياي”. بس العداله ما تمشي بالكم ولا بالكيف ، هي تمشي بطريقتها الخاصه ، انت كانسان ما تقدر تحسبها ، كثير قالها لنا الله .. في كذا آيه في القرآن يعلمنا الله اننا ما نحسب ، ما ننتظر الحياه تعدل ويانا لأن مو كل شي نتوقع انه عدل يكون هو العدل .. وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ ..

العداله مو موجوده بأي مكان ، هذا اللي يقوله وين داير ، بس اللي أنا مؤمنه فيه ، ان العداله هي جزء من الايمان ، الايمان بان الله عادل ، بانه مهما كان رح نحصل على كل شي نستحقه ، وكل شي نحصل عليه رح نحصل عليه لأننا عبيد الله ولأن الله يحبنا ! ولأن الله تنزّه عن الظلم .. ولأننا نعرف اننا ما راح ننظلم من الله رح نتقبل كل شي ، حتى لو ظلمنا واحد من الخلق .. لأنه حتى الظليمه من الخلق شي مو متعلق فينا .. ظلمه مو متعلق في شخصي ، ظلمه متعلق فيه ، فنقص بذاته ، وقلة رحمته. لما نعيش بنفسية ان احنا تحت مظلة ربنا ما راح نحس بالظلم أبدا أبدا .. رح نظل دايم نحس ان العدل هو كل شي نعيشه .

صعبه الفكره .. يمكن مثاليه زياده عن اللزوم .. يمكن أنا غلطانه ، ويمكن محد فهم لكن أنا مؤمنه فيها ألحين لمرحلة سامحت بعض الناس اللي ظلموني .. وتصالحت مع بعض الأشياء اللي مريت فيها بحياتي وحسيت فيها اني “مظلومه” لأن كل شي سيء ومو فمحله ومو منطقي حصل لي ماله علاقه فيني ، لأني انسان كويس وطيب وجيد .. وكل شي جيد مو دايم يحصل لي .

رح أحاول أكتب مقالات ثانيه متعلقه بالكتاب ، لأنه كتاب مو عادي .. يا ليتكم تقرونه   وللي ماله خلق : هنا تلخيص لهذا الفصل :http://kutucat.blogspot.com/2008/03/justice-trap.html

ريم ~

لما تحس وتؤمن ان الشمس كل يوم تطلع عشانك..وان السما كل يوم تحميك من الأجرام اللي تطيح..
لما تحس ان كل نجمه بالسما تموت وتعيش عشان تزين ليلك ..
لما تعرف ان الأرض تدور عشان تأمن لك ليل ونهار ..
لما تعرف انها تدور حول الشمس عشان تعيشك الصيف والشتا ..
لما تعرف ان الشمس بعيده عنك بالقدر الكافي وقريبه منك بالقدر الكافي .. عشان تعيش ..
لما تشوف ان خلق الله كله انخلق بطريقه تحميك أو تعطيك الدفعه اليوميه للحياه.. الهوا الطلق .. القمر اللي ياخذ من الشمس نورها .. الكهربا اللي تتكون بطريقه ربي سنها بالكون ..
الشجر اللي مرتفع ارتفاع مناسب والورد اللي منخفض انخفاض مناسب..

لما تشوف التوازن بالكون اللي انخلق كله عشان يتناسب معك..وانخلقت عشان تتناسب معه..
لما كل يوم كل يوم نعيشه..لما تعيش هالشعور رح تبتسم كل يوم ..لأنك مو وحيد عايش ..لأن كون كامل قاعد يمشي بطريقه تناسبك ..
رح ترفع يدك للسما تقول للي عطاك هذا كله .. شكرا..
حتى لو هموم الدنيا كلها فوق راسك ~

كم نوع فن طلع على الساحه ؟

الرسم ، التصوير ، الكولاج ، التصميم .. وكل فنان يتخذ واحد من هالفنون يبدع فمجاله أو يكون مقلد للمبدعين

فيه نقطتين مهمات فبالي أكتبها فهالتدوينه ..

نقطتين اكتشفت انها أوهام احنا عيشناها نفسنا .. أو myths

• ان الابداع هو الأصاله ويجي من “التفكير خارج الصندوق”
• اني اذا فشلت في الرسسم أو التصوير أو الكولجه أو التصميم .. فأنا مو فنان !

أين يقع الابداع ؟

الحقيقه ان الابداع نهايته اننا نطلع بفكره ابداعيه وخارجه عن الاعتياديه .. لكنه يبدأ “بالتقليد” ، فكرة الابداع تشبه فكرة الرسم أيام الطفوله ، لما كنا صغار كنا نرسم رسمات تعلمنا اياها الأستاذه .. أو نطلطل في رسمات أصحابنا ونعرف كيف نرسم .. أو أهلنا ياخذون القلم ويرسمون لنا على الكراسه .. والا كيف كلنا واحنا صغار تعلمنا نرسم الشخصيه الخطوط .. دائره .. خط الجسم وأربع خطوط قصار لليدين والرجلين ..
توني بوزان يقول ان التقليد هو بداية الفن .. وانه الشيء اللي يعيد الفنان بداخلك . (*) .. فكر بالعياره مجددا وحاول تطبيقها !

الفن . .

كنت أظن ان الفنون تعتمد اما على مهارة يدك في الرسم أو في الأعمال اليدويه ، أو على أفكارك الابداعيه وفنك في التقاط الصور أو تركيب الأشياء والرسمات عشان تطلع لك تصميم ..بس العالم الفني طلع أوسع من كذا ! ..
اللوحات الزيتيه والفن التشكيلي فن قدير ، لكن الآن الناس تبحث عن البساطه والوضوح والأشياء الجديده ..وكونك ما قدرت تصبح فنان تشكيلي أو رسام .. لا يعني ان ابداعك غير موجود !لكن المهاره غير متوفره ..
أي شيء جميل هو نوع من أنواع الفن ، ممكن شي مو جميل جدا ، لكنه فكره ابداعيه للغايه يكون فن جميل وشيء ينضاف للعالم .. ممكن يستفيد منه مسوّق ، مدير حمله اعلانيه ، اعلامي .. وهكذا وانت تستفيد اما ماديا والا معنويا .. انك تركت أثرك على العالم ..

الصوره تتحدث . .

كريس دوروز :

أول مثال رح أذكره .. الفنان كريس دوروز -مو متأكده من اسمه الأخير- فنان يستعمل نقاط الصبغ أو ألوان الاكليريك وخيوط ، عشان يخلق رسمات بأبعاد متعدده..
هنا صور لأعماله :

لازم تشوفون الفيديو عشان تفهمون شكل العمل الفني .. هو فن حي جدا جدا .. وغير تقليدي بالمره : ) شاهدوا الفيدو هنا : http://www.chrisdorosz.com/Pages/index.html
ولو قرأتوا الكلام اللي كتبه عن نفسه رح تعرفون قد ايش هو واثق من نفسه ورافع فنه فوق خاصة انو هو اللي بدأ فيه على ما أعتقد ..

التايبوقرافي :

هو نوع من الفن المتعارف عليه ، تبتكر طرق وخامات غريبه للتعبير عن الأحرف .. ربما مرت علينا كثير .. بس ما عرفنا انها فن بحاله

للمزيد : http://koikoikoi.com/2009/10/objects-typography-by-vladimir-koncar/

البزنس كاردز :

أكيد وصلت لكم ايميلات عن البزنس كاردز الغريبه ،

هي صوره عمليه لفكرة “الشيء الجميل اللي نعتبره فن”، والأفكار الابداعيه

للمزيد  http://creattica.com/business-cards/latest-designs

Jin Young :

مره قعدتوا تطلعون بلاستيك فاضي أو داخله ماي وحسيتوا انه شي جميل ؟

جن يونق أبدع وصار يعمل تماثيل شفافه ..

سياره وشوية صبغ وفنانين:

تتذكرون التايبوفوقراف اللي قلت لكم عنه ؟
تفرجوا على هالفيديو :

http://vimeo.com/5233789

أخذوا سياره واثنين خبيرين في التايبوقراف وخبير في سباق السيارات ..وحاولوا يعملون خطوط بالسياره ..

ماركر ومستر سليب :

هذا الفنان “مستر سلييب”، يستخدم فقط الماركر والأوراق .. رسمه مو خنفشاري جدا لكنه قادر يخلينا نحس بالخنفشاريه

للمزيد : http://www.flickr.com/photos/mister_sleeep/sets/72157603288530226/

فيه أكثر من كذا ، لكن ما فيه مجال لذكر كل شي موجود .. لأنه فعلا كثيــر جدا !
فيه ناس متخصصه بالفيديوهات وتركيبها ، تصميم المواقع الآن صيحه ، فيه ناس متخصصه تبتكر أفكار للتي شيرتات والجزم والاكسسوارات ..
فيه مجالات جديده ومتعدده ..ممكن تبتكر مجال وممكن تقلد مجال وتبدع فيه بعد فتره ..
ابحث عن فنّك .. وتذكر جيدا :

المهم الاتقان .. الاتقان .. الاتقان !

تأمّل . .

فكر بالأشياء اللي تسويها كل يوم أو تحب تعملها ، ممكن تطلع منها مليون ألف شيء فنان .. طيب كيف ممكن تلقى فكرتك ؟
انك تتأمل في الأشياء بطريقه اعتياديه جدا ، لكن ايجابيه .. وهالشي مو سهل ومحتاج قوه عظيمه !
فنظري أشوف ان الايمان بالله أكثر شي ممكن يساعدك تحس انه شيء داخل فشيء؟
لا فكر أكثر ! لما تكون مؤمن جدا .. وحاس بالرضا عن حياتك ، لدرجة انك تحب عيوبك الخاصه وعيوب الناس اللي حولك .. وتملأ قلبك بحب الله ورسوله ثم بحب الناس..
رح ترزق شيئين .. البصيره ، والايجابيه وبكذا توصل الى الابداع
ويا رب أيامكم كلها ابداع وفن ..
تواصلوا معي بفنكم ..

ريم

2009 سنه غريبه ،
بيّنت لنا قد ايش مجتمعنا محتاج وقفه عميقه عشان نفهمه ..
قصص الشيوخ اللي صار بسهوله التهجم عليهم – هم مش مرفعين ، بس في الظاهر قل احترامنا لهم – قصة الشيخ الشثري ، جامعة الملك عبدالله وافتتاحها ، تخريب اليوم الوطني .. وهذا بس  recently  .. واللي قدرت أجمعه من الكم شهر القريبه ..
المشكله ان لكل فعل ردة فعل ، وردود أفعالنا كانت قمه في الغرابه..
أحيانا كانت ردة فعلنا ضعيفه في مقابل الحدث..مثل قضية الشثري ، أو تخريب الخبر ..
رغم ان كل حدث سلبي صار ، هو فرصه للمثقفين والملتزمين والراقين للتدخل والقيام بحركه حلوه تفيدنا من اللي صار ..
ما أدري هي السياسه تغيرت بعد وفاة الملك فهد وأنا مدري :/ وعدنا الى الزمن الأغبر حق رمي الناس من الطيارات .. :/
في كتاب قوانين النهضه للد.جاسم سلطان يتحدث عن الفرصه ،
يقول لنا الدكتور أن  “الفرص تتاح لكل الأمم وباستمرار حتى تنهض وتتحرر”
يقول ان المنظمات الصغيره ما تملك كل الفرص، فيه أحداث تحصل تكون خارج يدها لكنها فرصه ، لكن لابد انها تكون جاهزه لاستغلال الفرص ..الفرص للتغيير واثبات وجهات النظر .. ولم أنصار حولها .. واثبات الحق وكسر خشم الباطل !!
قضية الشثري اللي حصلت … هذي أكبر فرصه نحصل عليها ..
نفهم منها اننا “مقيدون”
الآن.. ما نحتاج ردود أفعال ..
نحتاج استغلاليه للفرص ، وقوه كبيره لمقاومة الانحدار اللي احنا فيه ..
نحتاج نكون جديين ..
و”نعمل شيء”
وألحين صدقوني ، حتى “الكلمه” صار شيء ..
حتى الورقه تتوزع صارت شيء..
عن نفسي ببدأ أعمل شي ، أي شي .. ومثل ما تقول آلاء الصديق في الايميل المؤلم اللي أرسلته لنا :

“الآن سأفعل ذلك مرة أخرى بل وأكثر من ذلك ولو كنتُ وحدي، سأكون أنا المتبوع لا التابع، ليعلم الجميع بالأمر.”

وأخيرا رجعت مدونتي ،أخيرا أعود الى بيتي

رغم أنه في دومين جديد .. الا أني أشعر أنه كما هو .. كما كان

أعتذر الى صديقتي تشوكليت ، شكرا على الايميلات السائله :”)..

باسمه تعالى أبدأ سنتي الجديده ،

وعلى شرف تشوكو هذه البدايه ~

قريبا أعود بالجديد

“لو كان لابن آدم واد من مال لابتغى إليه ثانيا، ولو كان له واديان لابتغى لهما ثالثا، ولا يملأ جوف ابن آدم إلا التراب“أحمد في مسنده ومتفق عليه [البخاري ومسلم]

هذا الحديث يعني بالمختصر المفيد :  أن الموت هي نهاية لرغبات الانسان ..

الا أني تأثرت به من ناحية أخرى ،
فالمال والوديان ليسوا من الأمور التي أهتم فيها – على الأقل حاليا – لكن الاشباع النفسي والاشباع الروحي ..
الاحساس بأهميتي كشخص ..
البحث الدائم عن الكمال .. الـ  fulfilment
و”الرضا عن ريم”هذا ما أجمعه في “جوفي” .

اكتشفت اني “بكل طمع” أبحث عن النوع الطمّاع من الرضا عن النفس .
النوع الذي لا يشبعه شيء .. ويلتهم كل احساس جيد في داخلي .. ويخلف وراءه الاحساس الدائم بالذنب،
أما النوع الواقعي المنتمي للقناعه والمرتبط بالرضا عن الله .. هو الذي لن يملأ جوفي الا التراب لو لم أستطع الوصول اليه ..
*
سألت صديقتي عن معنى الرضا عن النفس .. أخبرتني أنه “أن أصل لمرحلة ممتازه في الأمور التي تشعرني بالرضا عن نفسي”
لا أدري لماذا نحن نفهم الرضا عن النفس بهذه الطريقه ..
هل هو أثر من آثار الزمن الذي ولدنا فيه ؟ – الملاصق تماما لفترة الصحوه – أم هو نابع من طريقة تربيتنا على جلد الذات والنظر للأعلى دوما حتى تنكسر رقابنا  ..!

أشعر أن هذا التعريف بعيد تماما عن المعنى الصحيح للرضا عن النفس ،
لأني مهما وصلت لمستوى جيد سأشعر دوما أني يمكن أن أكون أفضل وأحسن..وهو أمر واقعي جدا ..

وهذا الرضا هو النوع الطماع الذي عنيته في بداية المقال .
*
الرضا المرتبط بالرضا بقدر الله .. ليس هو “مصالحة النفس” وترضيتها ..
بل هو الرضا المرتبط بكمال الايمان بقضاء الله وقدره ..

والذي يعني .. أن أكون راضيه عن نفسي .. ليس لأنها نفسي .. ولكن لأن هذا ما قسمه الله لي ..
أظن أنه من كمال الايمان – كمثال- أنه عندما يرزقني الله الهداية متأخره .. أن أرضى عن نفسي لأن الله لم يقسمها لي أسرع من غيري ..!
لأن جلد ذاتي ورفضها والشعور بنقصها الدائم دون شكر الله على كمال بعض أجزاءها يضيّع من وقتي الكثير .. كان يمكن أن أستغله في حمد الله وشكره على أني مسلمه أوحده وأقوم بما أستطيع ليرضى عني ..

طبعا هذا مختلف عن الرغبه بالتطوّر .. فالتطور مفهوم لا نهائي .. ينتهي عندما يملأ جوفنا التراب ..
لكن الرضا عما وصلنا اليه .. هو الذي – أرى شخصيا – أنه مرتبط بالرضا والشكر لله ..

أعتقد لو وصلت لهذا النوع من الكمال الايماني سأعيش نوعا من الـ fulfilment .. نوعا جديدا من حب الله .. عبر حبي لذاتي ورضاي عنها . . ذاتي التي رزقنيها لي الرزاق.

اللهم أعوذ بك من رضا لا يملأ جوفي حتى يملأ جوفي التراب ..
اللهم ارزقني رضاك عني .. يا حبيبي يا كريم يا رحيم يا رزاق ..

طبعا هذا رأيي ، ريم ، و21 من الحياه على هذا الكوكب..
رأيكم؟