“أيوا أعرف .. من زمان ما كتبت..أمشوا نسولف!”

على مكتبي كان فيه دفتر قديم .. أخذته للشغل وأنا طالعه بالغلط ،
فتحته بالسياره أكتب .. ما فيه ولا صفحه فاضيه ..
هذا الدفتره يمثل سنتين من حياتي .. سنة ما بعد الثانوي ، وسنه أولى جامعه ..
أول صفحه كان مكتوب عليها “أصول الفقه لابن عثييمين-الشريط الأول” فالزمن الغابر انغصبت أسوي أشياء كثيره بس أكيد ان هالشي كنت مسويته من حب ..
كان واضح اني أتعذب .. لأني أعرف عن نفسي ان سماع الأشرطه يتعب مخي .. ولازم أعيد كل 15 دقيقه عشان مخي يتنح ..
وغير كذا .. كنت ألخّص .. وألخّص باخلاص ..
وأشرح تلخيصي .. وأنا شخص .. لا يلخّص وولا يحب التلاخيص ..
قرأت كلامي .. يا الله ، ايش اللي حفزني أدرس أصول الفقه؟
اش اللي خلاني أقرر قرار زي كذا مع اني كنت أفهم نفسي كفايه اني أعرف ان عقلي لا يمكن أن يستوعب هالأمور استيعاب تام..
صدقا صدقا ما أتذكر شي من اللي كنت كاتبته ..
فتحت الصفحات ، كنت أكتب كم دقيقه من شرح بن عثيمين صار مو مسموع ..وبالرصاص أحط شرح .. وبالتركواز أكتب أسئلتي داخل دوائر كبيره مكتوب داخلها “سؤال”.. ودي أعرف ايش الحافز؟ ..
بعد الأشرطه تلاخيص ثانيه .. بعدين فجأه كذا .. شرح الكالكلس .. قعدت أضحك .. هذي الماده أخذتها بالصيف، وكنت مصره آخذ فيها درجه كويسه ..
وكنت مره مخلصه بالتلاخيص والشرح وكنت مخلصه بالدراسه والتمارين  ..
بعدها بشوي لقيت جدول أعمالي اليوميه بالعطله ، أنا متأكده ان هالعطله اللي كتبت فيها جدول أعمالي كان بعد الصيفي ..
يعني كان قدامي ثلاث أسابيع تقريبا مو أكثر ..
كانت مرتبه انو أتعلم شغله معينه بالفوتو شوب .. وزي العاده .. زحمت نفسي بمليون شغله فكل يوم . .
وأكيد بدون ما أبحث عن دلائل .. أكيد اني ما طبقت الا 20% منها .. ويمكن أقل..
طبعا في داخل الدفتر أفكاري واقتراحاتي لنفسي .. تويتري الخاص تقدرون تقولون .. ونفذت من الاقتراحات اللي قريتها .. يمكن ثلاثه بس ..
عشان أقول لكم النتيجه اللي وصلت لها من هذا الدفتر المليان بالانجازات الشكليه ..
تلاخيص الأشرطه وبعض الكتب كان فيها أسئله حمقاء جدا ، وللحين ما أعرف ايش جوابها .. يعني أنا ما سألت زي ما كنت أبي .. وبصراحه شديده .. ما أذكر شي منها الا يمكن 1%..
الماده أخذت فيها درجه عاديه .. يمكن B+  أو A  يعني مو A+ حتى بس أذكر كنت فرحانه فيها لأني فاشله بالرياضيات ..
وزي ما قلت .. الجدول الفنان الجميل .. طبّقت منه 20% بس .. الشي الوحيد اللي أتذكر اني وصلت له اني رسمت رسمات جديده بس التقنيات الجديده اللي أبي أتعلمها ما تعلمتها ..

دايما كنت أعذّب نفسي بموضوع الأهداف واني ما أوصل للي أبيه ، واني المره الجايه بلقى حل أحسن وخطه أفضل وأركز على بعض الأمور ..
من هالدفتر .. أدركت اني زي ما أنا مره كويس اللي أسويه ، يعني اللي سويته وصّلني لأشياء كويسه .. تعلمت شوي وأخذت درجه مو واطيه .. ورسمت أكثر .. يعني مو اني طلعت بلاش بالعكس .. أشكر ريم القديمه على هذي الفتره ،
أحيانا أخطاء التخطيط ماهي أخطاء فعلا .. يمكن ان الكميات الهائله اللي حطيتها لنفسي وما نفذتها مستحيل انجازها .. بس على الأقل أنجزت منها 10% .. وهالـ10% بقت معاي .. وأنا شخص كان يحاول .. ومحاولتي فعلا مو فشل .. والأشياء الغبيه الصغيره اللي سويتها ..
تعتبر انجاز ..

من هذا الدفتره أدركت .. ان قصص الناجحين المخططين والمنجزين والكويسين جدا .. “خراط” ..
لأن يعني معليش  .. هم مثلا يجون يجيبون قصة آينشتاين اللي كان يجلس في مكتبه ومدري وشو انطرد من المدرسه مدري ايش
طيب واحد انطرد من المدرسه وصار مشهور وعالم .. لأنه .. عبقري “بكل بساطه”.. وعشره انطردوا وصاروا حراميه
بس أنا .. وانت يمكن .. احنا ألحين ناس عاديه ، ليه أقرر اني شخص مميز وقوي وبطل .. وأرفع راية الحرب على الحياه وأقرر اني أكون أفضل شخص وعبقري وشي مهول ..
وأنا لسا زي ما أنا .. ما كسبت مهارات التميز والقوه والبطوله ..

يعني نرجع لقصة آينشتاين مدري أديسون لما انطرد من المدرسه . . لو أنا مو أديسون وانطردت من المدرسه لأن الأستاذ يقول اني غبي .. بروح أتعلم وأحاول وأعوّض نقصي .. يمكن اني عبقريه بنسبة “2.2%” .. ويمكن لأ . . بكل بساطه ممكن أكون شخص عادي يحتاج يبذل مجهوده ..

لما أرفع الرايه وأقرر اني مميز .. لابد أن أكسب ما يؤهلني اني أكون مميز ..
مو بانجاز ، لأ .. مهارات .. محاولات .. جهد .. عرق جبين .. ضغط على نفسي .. صدق مع الذات ..
ومو لازم أخترع الكهربا ، بس ممكن أصير انسان أفضل شوي ، أحسن شوي .. نسخه معدّله ..
على الأقل .. على الأقل ما أظل عايش مع نفس الانسان طول العمر .. أغيّر فيه حبه .. حبتين ..

تذكرون مقولة طارق السويدان “يعيش عادي ويموت عادي”
العادي مو هو الانسان اللي ما عنده جينات العبقريه أو الذكاء الخارق اللي عند طارق السويدان ، العادي فنظري هو الكسول ..
اللي يحاول بصدق ويبذل بصدق .. حتى لو ما وصل .. بيموت وهو يحاول .. والمحاوله جميله وتعطيك شعور مب عادي ..
وتحس انك مو عادي .. وانت بتكون مو عادي ..
والمية لون اللي استخدمتها بالتلاخيص بالدفتر الأخضر دليل على احساسي المو عادي

تحسون انكم فهمتوا شي؟

الزبده ، أنا قررت انه لا عيب في اني لسا ما وصلت لما يؤهلني أكون آينشتاين والا عمر بن الخطاب والا طارق السويدان ..
قررت اني شخص يبي يكون سعيد .. وشخص عادي يحاول

هذه التدوينة ادرجت بتاريخ 26 يوليو 2010 في الساعة 12:42 ص ضمن تصنيف تصنيف لحاله !. يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.